SIRINATI AMARI

Volia 'i sugnu cantanti, e no scrivanu,
menzu poeta e senza 'nu carrinu,
'i cantu 'a notti sutt'a 'nu mignanu,
ccumpagnatu 'i chitarra e mandolinu.

Volia mi fazzu tanti sirinati
pa tutti chigli fimmini 'mpelici
chi sunnu schjavi, o chi non sunnu amati,
o chi campanu fandu sagrifici.

'A prima s''a farria a gli dipendenti,
giuvani e belli chi, pa lavurari,
stannu sutta patruni 'ntraprendenti,
chi a tutt'i costi''vonnu ccalappiari.

Po' 'n'atta, tutta chjna 'i sentimentu,
s''a faciarria a glia fimmina 'ngannata
chi, cridendu a 'nu farzu giuramentu,
si trovau cu 'nu figghju a 'mmenz''a strata.

E 'n'atta p'ogni fimmina spruttata,
chi, lavurandu, squagghia comu cira;
e mò, chi finarmenti è pinzionata,
cu quattru sordi, 'ndav'ancora ' i stira.

'Na sirinata apoi si vorria fari
a glia fimmina bella violentata
du' "brancu" in libertà chi, pa scherzari,
dici ca si trattau di 'na "bravata".

E puru una a gli disgrazijati,
chi sunnu schjavi di li protetturi
e si vindinu 'u corpu pa li strati,
senz''e sannu chi è lu veru amuri.

'Na sirinata chjna di durcizza
s''a faciarria a glia fimmina perduta
'nte mani 'i nu maritu c''a 'ccarizza,
mentri cu 'n'atta fimmina è traduta.

E volandu 'nta atti continenti,
'na sirinata si farria a glia mamma,
chi perdiu 'u figghju ma non sapi nenti,
'nta 'na barca chi tutti nui 'ffundamma.

Mentri l'urtima, chjna 'i pojisia,
è pa glia figghja chi no 'naju 'cchjù;
'nu cantu amaru, chjnu 'i nostalgia,
'i 'rriva 'n cielu, 'nta sta notti blu ...

Serenate Amare, di Franco BLEFARI: Romantica, struggente poesia (In dialetto Benestarese) dedicata, con profondo sentimento, a tutte le Donne del Mondo. 
Ricevuta da Franco in una bella mattinata domenicale.